Ok een Spegel hett Geföhlen

Mörgens, meestens üm vördel vör acht, kickt Rieke dat eerste Maal in hör Spegel un sabbelt meestens gnatterig vör sük hin. Wat se nich weet is, dat hör Spegel hören kann un sück sien Deel denkt.

Maandag mörgen

Rieke seggt vergrellt: “Noch een Pickel, utrekend midden up mien Nöös!"

De Spegel: “Een Stip mehr maakt nu würkelk keen Unnerscheed.”

Dingsdag mörgen

Rieke kiekt bedröovt: “Oh Mann, ik hebb de Klüsen up Halvmast!”

De Spegel: “Fein vör di, denn süchst du tominnst dien Elend nich vull.”

Middeweek mörgen

Rieke sieht sük un jauelt: “Dat weer woll een Lüttje to vööl güstern. Mi is kodderig:-(“

De Spegel: “Een to vööl? Du hest noch alltied de Huck vull!”

Dönnerdag mörgen

Rieke bekiekt hör Gesicht un verklaart: “Ik bruuk een Dokter, de Wunner maakt un mien Pelle strammtrecken deit.”

De Spegel: “Blot nich! Mook di een stiev Dutt. Dat mutt langen!”

Fredag mörgen

Rieke grient: “Bod is dat Enn van de Week:-).”

De Spegel: “Daarvan kann ik blot drömen”

Saterdag Middag

Rieke kiekt frustreert: “Hüüt Avend is Party bi Wibke un ik hebb al wedder een groot Pickel, midden up de Bregen. Wat’n Schiet. Ik köönt mi övergeven!”

De Spegel: “Ik ok!”

Sönndag üm half fiev

Do kiekt een Maantje schellig in de Spegel, grient un denkt: “Wat bün ik för een Düvelskeerl!”

De Spegel: “Ik klööv ik spinn. De Keerl hett ja een Pickel up sien Nöös un een up sien Bregen.”

Sietdem höögt sük de Spegel un hangt alltied scheev.

©by Sigrun Al-Badri/ 2020

Maantje                          kleiner Mann

kiekt schellig                  schielt

Düvelskeerl                    toller Bursche

Bregen                           Stirn

grient                             grinst