Schweizer Käseallerlei

Wa wänd Sie?

Liebi Läserschaft
Hier jede Mendig en Kolumne zschriebe isch nöd immer ganz eso eifach. Nöd, dass mer wür Ziit fähle, die nimm ich mir. Aber immer es Thema zfinde, was alli wür interessiere, da macht mer mängisch scho es es bitz Chopfweh.
Klar, ich chönnt drüber schriebe, dass mir do in de Schwiiz no vo dem EHEC verschont sind. Oder über de jungi Schwiizer, wo gmeint hät, er müessi met 60kh/h uffeme Skateboard dur en vielbefahrne Tunnel fahre in Australie und sich dann ussegredt hät, er hät nöd gwüsst, dass da verbote sig. Oder dass de FCB (FC Basel) wieder Schwiizermeischter worden isch. Oder dass i mim Nachbardorf gester es Veloränne met internationaler Bsetzig gsi isch. (De Jan Ullrich isch dört in sine beste Ziite au derbi gsi und ich han ihn mal huutnöch vor mir gha.) Oder dass nöd wiit vo do entfernt wieder öpper brutal zamegschlage worden isch.

Aber send mer mal ehrlich. Wänd Sie da läse? Wür Sie da interessiere?
Dreie mer de Spiess doch emale umme. Drum frag ich Sie grad direkt:
Wa wänd Sie do läse? Wa interessiert Sie zerfahre do us de Schwiiz? Womit chönnt oder dürft ich Sie bgeistere?
Über Ihri Hilf und dRückmäldige froi ich mich jetzt scho.
Merci vellmal. Bis zum nöchste Mal.
I däm Sinn, wünsch ich Ihne en Wuche voller wunderbarer Momänt und Erläbnis.