Herbst

Wie ich vorige Wochn durch'n Wald gwandert bin,
hab ich dacht: wohl jeder Dichter hat den Herbst schon beschrieb'n
und an jeden Poet'n hat was anders dran gfalln
an de rot gelbn Blattln...wenns von d' Bam owefalln.
Ja, es is wie a Traum und ums Herz wirds an warm,
wenn die Sonn einelacht in an Wald voller Farbn.
I finds schön, daß der Herrgott den Herbst hat erdacht
wenn a ab und zu a Kastanie auf mein Kopf owakracht,

Doch dann gibts Momente, wo mei Freude verblasst,
weil der Regen de Schönheit zur Gefahr werden lasst.
Wann a Motorradlfahrer auf de Nasn fast fallt,
weil er am Laub in der Kurvn sei Maschin net derhalt,
wann a alts Leut auf de Blattln wa auf Eier muaß gehn..
na, dann find i den Herbst beim bestn Willn nimmer schön.